१७ वैशाख, रामेछाप । रामेछापको मन्थलीमा आगोलागिमा परी एकै घरका दुई जना घाइते भएका छन् । घाइतेहरूको उद्धार गरी काठमाडौँ लगिएको छ । 

सोमबार दिउँसो वनबाट सल्किएको आगो घरमा समेत लाग्दा नाताले ससुरा बुहारी पर्ने जलेर घाइते भएका हुन् । घाइते हुनेमा मन्थली नगरपालिका वडा नं ११ गेलु नाटिलाका बलबहादुर लो (तामाङ) र बुहारी नाता पर्ने बस माया तामाङ रहेको सोही वडाका वडा अध्यक्ष भीमबहादुर थापा मगरले रामेछाप टाइम्सलाई बताए । 

अध्यक्ष थापा मगरका अनुसार जङ्गलबाट सल्किएको आगो घर गोठमा समेत लाग्न थालेपछि गोठमा रहेको भैँसी फुकाउन जाँदा उनीहरूलाई आगोले पोलेको हो । भैँसी पनि आगोलागिले जलेको छ । 

उनीहरूको शरीरको विभिन्न भाग जलेको छ । घर गोठ पनि सल्किएको आगोले जलेको छ । आगो स्थानीयहरूको सहयोगमा नियन्त्रणमा लिएको वडा अध्यक्ष थापा मगरले बताए । ‘पूरै नियन्त्रणमा आउन बाँकी छ ।’

‘बुहारीको अलि गम्भीर रहेको छ । ससुराको अवस्था सामान्य रहेको छ । हामीले उद्धार गरी कीर्तिपुर अस्पताल पठाएका छौँ’ अध्यक्ष थापा मगरले भने ।

आगोले जलेपछि उनीहरूलाई उद्धार गरी मन्थली अस्पतालमा ल्याइएको थियो । मन्थली अस्पतालमा सामान्य उपचारपछि थप उपचारको उनीहरूलाई काठमाडौँ लगिएको मन्थली अस्पतालले रामेछाप टाइम्सलाई बतायो ।