१ मंसिर, रामेछाप । रामेछापकी बविता पोखरेलले ‘डान्स च्याम्पियन सिजन–२ को उपाधि जितेकी छन् । उपाधि विजेता पोखरेललाई गृह जिल्ला रामेछापमा भव्य स्वागत समेत गरिएको छ ।  गएको जेठबाट सुरु भएको डान्स च्याम्पियन सिजन–२ को गत कात्तिकमा भएको फाइनलमा सेमिफाइनल राउनबाट ८ जना र ६ जना फाइनलिस्ट प्रतिस्पर्धिहरुलाई पछि पार्दै उपाधि हात पारेकी पोखरेलले नगद १७ लाखसहित १५ लाखको इन्स्योरेन्स र गिफ्ट हाम्परहरु हात पारेकी छिन् । नगद पुरस्कार केही पाइसकेको र केही मासिक रूपमा प्राप्त हुने विजेता पोखरेलले रामेछाप टाइम्सलाई बताइन् ।

‘एपिअन’ टेलिभिजनबाट प्रसारण भएको सो प्रतियोगिताको ओएसआर डिजिटल युट्युब च्यानल मार्फत भिडिओहरू सार्वजनिक भएको थियो । चर्चित कलाकारहरू प्रेङ्का कार्की, गम्भीर विष्ट र कविता नेपाली ‘जर्ज’ रहेको सो रियालिटी सोमा सहभागी प्रतिस्पर्धिहरुलाई भोटिङ सहितले पछि पार्दै उनले उपाधि जितेकी हुन् । 

जिल्लाको लिखु तामाकोशी गाउँपालिका–७ तिल्पुङ् घर भएकी उनी रामेछाप साँस्कृतिक कलाकार समाजको सामाजिक सह–कोषाध्यक्ष समेत हुन् । केही समयदेखि कलाकारिता क्षेत्रमा सक्रिय पोखरेलले राष्ट्रिय स्तरको रियालिटी सोमा जिल्लाको पनि महत्त्वपूर्ण प्रतिस्पर्धा गराउँदै ट्रफि जित्न सफल भएकी हुन् । 

आफू विजेता भइसकेको र आयोजकको तर्फबाट भिडिओ भने सार्वजनिक हुन बाँकी रहेको बताउँदै पोखरेलले आफ्नो जित सबैको सहयोगले हुन सफल भएको धारणा राखिन् । 

च्याम्पियन बनेर जिल्ला आएकी पोखरेललाई जिल्ला सदरमुकाम मन्थलीमा पञ्चेबाजासहित भव्य स्वागत गरिएको छ । साथै, मन्थली नगरपालिकाले समेत उनलाई स्वागत तथा बधाई दिएको छ ।