१२ माघ, रामेछाप । नेकपा (एमाले) निकट विद्यार्थी संगठन ( अनेरास्ववियु) रामेछापले आयोजना गरेको ‘मिनिपोस्ट फुटबल’ प्रतियोगिताको उपाधि एबिसी आकाशेले जितेको छ । 

१६ टिम सहभागी सो फुटबल प्रतियोगितामा एटिसी मन्थली बजार ब्वाइज टिम (सी) लाई पछि पार्दै एबिसि पहिलो भएको (अनेरास्ववियु) केन्द्रीय कमिटी एवं रामेछाप इन्चार्ज टंक घतानीले जानकारी दिए । 

उनका अनुसार विजेताहरूलाई नेकपा (एमाले) बागमती प्रदेश कमिटी सदस्य एवं मन्थली नगर प्रमुख लव श्रेष्ठले (अनेरास्ववियु) जिल्ला अध्यक्ष पुष्कर भट्टराईसहितको उपस्थितिमा नगद २० हजार शिल्ड, मेडल र प्रमाणपत्र  प्रदान गरे । 

त्यस्तै, दोस्रो भएको एटिसी मन्थली बजार ब्वाइज (सी) नगद १० हजार, शिल्ड, मेडल र प्रमाणपत्र प्राप्त गरेको छ । शुक्रवार देखि मन्थली माविको खेल मैदानमा भएको मिनिपोष्ट फुटबलमा मन्थली बजार ब्वाइजले व्यवस्थापन गरेको थियो । 

युवाहरूलाई फुटबल खेल प्रति आकर्षण गर्ने उद्देश्यले आयोजित दुई दिने प्रतियोगितामा ‘उत्कृष्ट ४ विधा’ मा चार जना खेलाडी मेडल र प्रमाणपत्रबाट पुरस्कृत भएका छन् ।