अनेरास्ववियु रामेछापले शुक्रवारदेखि ‘अण्डर २०’ पुरुष भलिबल प्रतियोगिता गर्दै (भिडिओसहित)
५ फागुन, रामेछाप । नेकपा (एमाले) निकट विद्यार्थी संगठन (अनेरास्ववियु) रामेछापले ‘तीनलाल स्मृति कप–२०८१ पुरुष भलिबल प्रतियोगिता (अण्डर २०) आयोजना गरेको छ । त्यसको लागि आवश्यक तयारी भइरहेको आयोजकले जनाएको हो । साथै, यो प्रतियोगितामा अत्याधुनिक प्रविधिको प्रयोग गर्ने आयोजकको भनाई छ ।
सोमबार तीनलाल पार्कमा पत्रकार सम्मेलनको आयोजना गरी (अनेरास्ववियु) रामेछापले नेपाल कम्युनिष्ट पार्टीको संस्थापक महासचिव पुष्पलाल, विद्यार्थी सहिद गंगालाल, प्रथम साहित्यिक सहिद सुब्बा कृष्णलाल (तीनलाल) को जन्मस्थानमा उनीहरूको योगदानको कदर गर्दै खेलकुदका माध्यमबाट मुलुकभर सन्देश प्रवाह गर्ने मूल लक्ष्यका साथ खेल आयोजना गरिएको अध्यक्ष पुष्कर भट्टराईले बताए । खेल जिल्ला समन्वय समिति रामेछापको खेल मैदानमा खेलाइने छ ।
प्रतियोगितामा रामेछाप जिल्ला र छिमेकी जिल्लाका गरी २० टिमको सहभागिता हुने आंकलन गरिएको उनको भनाई छ । ‘अहिले सम्म काठमाडौँ, भक्तपुर, रसुवा, सिन्धुली, ओखलढुङ्गा र काभ्रोसहितका जिल्लाहरूबाट सम्पर्क भइसकेको छ ।’
प्रतियोगिताको विजेताले नगद ५० हजारसहित शिल्ड, मेडल र प्रमाणपत्र प्राप्त गर्ने छन् । भने, उप–विजेताले पनि नगद ३० हजारसहित शिल्ड, मेडल र प्रमाणपत्र प्राप्त गर्ने छन् ।
त्यस्तै, सेमिफाइनलमा प्रवेश गर्ने तर फाइनल प्रवेश नगर्ने दुई टिमलाई नगद १०–१० हजारसहित प्रमाणपत्र प्रदान गरिने आयोजक (अनेरास्ववियुले) जनाएको हो ।
त्यस्तै, उत्कृष्ट खेलाडीलाई नगद ३ हजार सहित ट्रफि प्रदान गरिने र उत्कृष्ट कोचसहित ६ विधा छनौट गरी नगद १ हजार ट्रफिले पुरस्कृत गरिने छ ।
खुल्ला भलिबलको फागुन ९ गते शुक्रवार दिउँसो १ बजे (अनेरास्ववियु) केन्द्रीय सचिव डा. सुजन कडरियाले नेकपा (एमाले) प्रदेश कमिटी अध्यक्ष कैलाश प्रसाद ढुंगेलसहितको उपस्थितिमा उद्घाटन गर्ने छन् । भने, समापन अनेरास्ववियुका केन्द्रीय अध्यक्ष समिक बढालले गर्ने बताइएको छ ।
