६ फागुन, रामेछाप । दोरम्बा शैलुङ् गाउँपालिकाका अध्यक्ष मैनकुमार मोक्तानले डिभिजन वन कार्यालय रामेछापको कार्यशैली ठिक नभएको भन्दै अख्तियारमा मुद्दा हाल्ने चेतावनी दिएका छन् । वन कार्यालयले गर्ने गतिविधि स्थानीय तहसँग समन्वय र सहकार्य गरेर गर्दा जस्तो सुकै सहयोग गर्न तयार रहेको प्रतिबद्धता जनाउँदै समन्वय र सहकार्य नगरे  अख्तियारमा जाने चेतावनी दिएका हुन् । 

मंगलबार डिभिजन वन कार्यालय रामेछापले डढेलो रोकथाम गर्न भन्दै आयोजना गरेको जनप्रतिनिधिसहित सरोकारवालाहरू बिचको अन्तरक्रिया कार्यक्रममा बोल्दै पालिका अध्यक्ष मोक्तानले भने ‘वन कार्यालय पालिका जाँदा बिरालोको शैलुमा जानु हुन्छ । थाहा पाइँदैन । अनि एउटा रुख काट्यो भने खबर आउँछ । खोजी हुन्छ । वन फडानी गर्दा मात्रै थाहा पाइन्छ । स्थानीय तहसँग कुनै सहकार्य भएको छैन । यसरी नै चल्ने हो भने अख्तियार जनप्रतिनिधिलाई मात्रै लाग्दैन । वनलाई पनि लाग्छ, हामी अख्तियार जान्छौँ । मुद्दा हाल्छौँ ।’

स्थानीय तहको आफ्नो अधिकार रहेको उल्लेख गर्दै गाउँपालिका अध्यक्ष मोक्तानले दोहोर्‍याए ‘वनलाई मुद्दा हाल्ने कुरा हामीलाई पनि थाहा छ ।’

अन्य स्थानीय तहका जनप्रतिनिधि, पत्रकार, गैरसरकारी संस्था महासंघ र सामुदायिक वनका कर्मचारीहरूको उपस्थितका बिच उनले चेतावनी दिँदै भने ‘हरियो वन नेपालको धन’ भन्ने भनाइलाई व्यवहारमा लागू लागू गरौँ ।’

दोरम्बा गाउँपालिकामा ४ करोड बढीको लोक्तो निर्यात गर्न सकिने भए पनि त्यो वन कार्यालयको लापरबाहीको कारण खेर फाल्नु परेको तर्क समेत गरे । समन्वय र सहकार्य गरे पालिकाहरूले वनलाई पर्याप्त बजेट छुटाउने जिकिर गरे । 

जिल्लामा रहेको वनको सही सदुपयोग गर्दै वनलाई स्थानीय तहको आम्दानीको स्रोत बनाउन लाग्नु पर्ने र विदेशबाट काठ आयात गर्ने वातावरणको अन्त्य गर्नु पर्नेमा पालिका अध्यक्ष मोक्तानले जोड् दिए । उमाकुण्ड र दोरम्बा शैलुङ् गाउँपालिकाका ठुलो वन क्षेत्रको सही सदुपयोग गर्दै वन कार्यालयले स्थानीय तहसँग समन्वय र सहकार्य गर्दै समुदाय र सरकारले प्रयोग गर्न पाउनु पर्छ भने। ‘तपाईँहरूलाई कोडिनेशन गर्न पनि यस्तो गाह्रो किन ?’

गाउँपालिकाको बारेमा नकरात्कम प्रचार गरिएको तर्क गर्दै त्यो प्रचार गलत भएको जिकिर गरे । ‘दोरम्बा अर्कै हो भन्ने हल्ला फिँजाइएको छ । त्यो सबै भ्रम हो । यथार्थ अर्कै छ । समन्वय र सहकार्य गरेर हेर्दा थाहा पाउनुहुन्छ ।’