७ फागुन, रामेछाप । गिरिजा प्रसाद कोइराला फाउण्डेशन रामेछापका अध्यक्ष एवं नेपाली काँग्रेस रामेछापका सचिव दीपक खड्काले १५ औँ जिल्ला महाधिवेशनमा पार्टी सभापतिको उम्मेद्वार बन्ने घोषणा गरेका छन् । पार्टीलाई संगठन बुझेको, सैद्धान्तिक र वैचारिक नेतृत्व रामेछापको काँग्रेसले खोजेको भन्दै आफूले सभापतिमा उम्मेद्वारी दिने घोषणा गरेका हुन् । 

७५ औँ राष्ट्रिय प्रजातन्त्र दिवसको अवसरमा मन्थली स्थित बिपीको शालिकमा माल्यार्पण गर्दै फाउण्डेशनका जिल्ला अध्यक्ष एवं काँग्रेस सचिव खड्काले भने ‘मेरो १५ औँ जिल्ला अधिवेशनमा पार्टी सभापतिको उम्मेद्वरी दिने घोषण गर्दछु।’

वर्तमान अवस्थामा पैसा भएकाहरूले पार्टीको संगठन र सिद्धान्त बुझेकाहरूलाई ‘घुमाइ रहेको’ आरोप लगाउँदै सचिव खड्काले भने ‘पार्टीलाई संगठन बुझेको मान्छे चाहिएको नेपाली काँग्रेस रामेछापले महसुस गरेको छ’, नेता कार्यकर्ताले संगठन बुझेको र  पार्टीलाई एक बनाएर हिँड्न सक्ने नेतृत्व खोजेको उल्लेख गर्दै उनले थपे ‘सुधारिएको लोकतन्त्र निर्माणका निम्ति सैद्धान्तिक र वैचारिक नेताहरू लड्नुको विकल्प छैन’ ।

संगठन, विचार र सिद्धान्त बुझेका नेताहरू अहिले बाहिर रहेको तर्क गर्दै उनीहरूलाई एक ठाउँमा ल्याउने र काँग्रेसलाई एक ढिक्का बनाउन त्यो नेतृत्व बन्न आवश्यक रहेको सचिव खड्काले जोड् दिए । 

७५ औँ प्रजातन्त्र दिवसको अवसरमा फाउण्डेशनको आयोजनामा बिपीको शालिकमा माल्यार्पण गर्दै प्रजातन्त्रलाई थप बलियो बनाउन सबै लाग्नु पर्नेमा सचिव खड्काले आग्रह गरे।  

१५ औँ जिल्ला अधिवेशन कहिले हुने भन्ने निश्चित नहुँदै सचिव खड्काले सभापति पदमा उम्मेद्वारी दिने घोषणा गर्नु ले काँग्रेस रामेछापको आगामी अधिवेशनमा रोक बन्ने देखिएको छ ।  

भिडिओ हेर्नुहोस्