मन्त्री पदको लोभ छैन, कुलमान जस्ता काम गर्ने मान्छेको पक्षमा उभिँदा गए पनि जान्छ –राज्य मन्त्री तामाङ
चैत, रामेछाप । ऊर्जा, जलस्रोत तथा सिँचाइ राज्य मन्त्री पूर्णबहादुर तामाङ (कान्छाराम) ले मन्त्री पदको लागि कामै नगर्नेहरुको पछि लागेर आफू नबस्ने बताएका छन् । आफू काम गर्नेहरूको पक्षमा रहेको जिकिर गर्दै काम गर्ने मान्छे जुनसुकै पार्टीको भए पनि खुलेर उसको पक्षमा उभिने अडान व्यक्त गरे । राज्य मन्त्री तामाङले आफू सरकारमै भए पनि सरकारको ‘डेलिभरी’ सन्तुष्ट हुने खाल्को भने हुन नसकेको धारणा राखे ।
शुक्रवार आदिवासी जनजाति पत्रकार महासंघ (फोनिज) बागमती प्रदेशको तेस्रो प्रादेशिक महाधिवेशन कार्यक्रमलाई सम्बोधन गर्दै मन्त्री तामाङले भने ‘म मन्त्री पद जान्छ कि भनेर काम गर्ने मान्छेहरूको पक्षमा उभिँदिन । काम गर्ने मान्छे जो छ, उसको म खुलेरै सपोट् गर्छु । त्यसैले कुलमान घिसिङको पक्षमा उभिएको छु । उहाँ रातदिन खटेर काम गर्ने मान्छे हो । बरु मन्त्री पद गए जान्छ तर काम गर्ने मान्छेको पक्षमा मेरो सपोर्ट् हुन्छ ।’
कुलमानलाई आफूले कुन पार्टीको हो भन्ने नचिन्ने तर राम्रो कर्मचारीको रूपमा सहयोग गरेको उनको प्रस्टोक्ति छ । नेपाली काँग्रेस रामेछापका पार्टी सभापति समेत रहेका राज्य मन्त्री कान्छारामले जनताको पक्षमा काम गर्ने मान्छेलाई सबैले सहयोग गर्न आवश्यक रहेकोमा जोड् दिए । राज्य मन्त्री तामाङले काम गर्ने कुलमानलाई हटाउन लाग्नु यो सरकारको गलत कदम भएको दोहोर्याए ।
अहिलेको गठबन्धनको सरकार ०८४ सम्म जानेमा समेत आशङ्का व्यक्त गरेका राज्य मन्त्री तामाङले भने ‘म मन्त्री छु तर हामी (यो सरकारले) चित्त बुझ्दो डेलिभरी गर्न नसकेकोमा म आफै सन्तुष्ट छैन ।’
बाढीले तहस्नस पारेको बिपी राजमार्ग निर्माणमा यो सरकारले ढिलासुस्ती गरेको स्वीकार गर्दै भने ‘चैतमा टेण्डर खुलाउने अनि असार–साउनमा काम हुन्छ । यसरी यो मुख्य सडकलाई व्यवस्ता गर्ने काम भयो ।’ राज्य मन्त्री (कान्छाराम) ले आफूलाई यो सरकारले बिपी राजमार्गको काम गर्न दिएमा बर्खामा पनि गाडी चल्ने गरी काम गर्ने समेत टिप्पणी गरे ।
