जेठ मसान्त भित्रै रामेछाप–काठमाडौँ सम्पर्क समितिको अधिवेशनसहित सबै तहको ‘सम्मेलन’ सक्ने काँग्रेस जिल्ला कार्य सम्पादन समितिको निर्णय
सांकेतिक तस्बिर
३ चैत, रामेछाप । नेपाली काँग्रेस रामेछापले पार्टीका विभिन्न तहका सम्मेलनहरू जेठ भित्रै सम्पन्न गर्ने निर्णय गरेको छ । आइतबार पार्टी कार्यालय मन्थलीमा सम्पन्न नेपाली काँग्रेस जिल्ला कार्य सम्पादन समितिको बैठकले आगामी जेठ महिना भित्र जिल्लाका सबै तहका सम्मेलनहरू सम्पन्न गर्ने निर्णय गरेको नेपाली काँग्रेस रामेछापले जनाएको हो ।
काँग्रेस जिल्ला कार्यसमिति रामेछापका कार्यवाहक सभापति लेखबहादुर कार्कीको अध्यक्षतामा सम्पन्न बैठकले यही चैत्र २३ गते जिल्लाका सबै वडाहरूमा वडा सम्मेलन गर्ने निर्णय गरेको कार्यसम्पादन समितिका संयोजक एवं पार्टी कार्यबहाक सभापति लेखबहादुर जानकारी दिए ।
साथै, बैठकले जिल्लाभरिको ६४ वटै वडाहरूको समेत सम्मेलन एकै दिन सम्पन्न गर्ने भएकाले त्यसको लागि जिल्ला प्रतिनिधिहरू समेत तोकेको छ । पार्टीको आन्तरिक सङ्गठनलाई थप क्रियाशित र मजबुद् बनाउँदै लाने आन्तरिक रणनीतिमा लागेको काँग्रेसले आगामी वैशाख ९ गते जिल्लाका ८ वटै स्थानीय तहको सम्मेलन गर्ने मिति समेत तोकेको छ । जसअनुसार वैशाख २७ गते प्रदेश ‘क’ र ‘ख’ को सम्मेलन तथा जेठ २३ र २४ गते जिल्ला सम्मेलन गर्ने गरी निर्णय गरेको छ ।
नेपाली काँग्रेसको विधान अनुसार हरेक वर्ष सम्पन्न गर्नु पर्ने विभिन्न तहका सम्मेलनहरू यस वर्ष जेठ महिना भित्र सम्पन्न गर्ने गरी तयारी अगाडि बढाइएको हो ।
त्यस्तै, बैठकले जेठ मसान्त भित्रै नेपाली काँग्रेस रामेछाप– काठमाण्डौं सम्पर्क समितिको अधिवेशन समेत सम्पन्न गर्ने निर्णय गरेको छ ।
