१९ चैत, रामेछाप । उमाकुण्ड गाउँपालिकाले यो वर्षको शैक्षिक सत्र समापन भयसँगै अर्थात् परीक्षा सकेर नजिता प्रकाशनसहित आन्तरिक कार्यमा जुट्दा शिक्षकहरूलाई आधारभूत कम्प्युटर तालिम दिन थालेको छ । एक हप्ते आधारभूत कम्प्युटर तालिमले शिक्षकहरूलाई प्रविधिसँग जोड्दै प्रश्न पत्र तयार जस्ता ‘कम्प्युटरको आधारभूत शिक्षा’ मा शिक्षकहरूलाई सहज बनाउने उद्देश्य रहेको पालिकाको शिक्षा शाखाले जनाएको हो । 

शनिवार देखि पालिकाका ७ वटै माविसहित निमावि र आवि सबै विद्यालयका शिक्षकहरूलाई कम्प्युटर रहेका मावि विद्यालयमा सामूहिक रूपमा कम्प्युटर कक्षा सञ्चालन गरेको शिक्षा शाखाले जानकारी गराएको हो । 

यही चैत ९ गतेको पालिकाको बैठकले सामुदायिक विद्यालयमा कार्यरत शिक्षकहरूलाई एक हप्ता सम्म आधारभूत कम्प्युटर तालिम दिने निर्णय गरेको थियो । सामुदायिक विद्यालयमा कार्यरत शिक्षक कर्मचारीहरूलाई सूचना तथा प्रविधि क्षेत्रमा अब्बल बनाई विद्यालयको शिक्षण सिकाई क्रियाकलापलाई प्रभावकारी बनाउने उद्देश्यका साथ कक्षा सुरु गरिएको पालिकाले भनेको छ । 

गाउँपालिकाको शिक्षा, युवा तथा खेलकुद शाखाले माध्यमिक विद्यालयको कम्प्युटर शिक्षकहरूलाई प्रशिक्षक प्रशिक्षण तालिम सञ्चालन गरी सात दिने आधारभूत तालिमका लागि कम्प्युटर तालिम कोर्स समेत निर्माण गरिएको पालिकाले भनेको छ । ७ दिने तालिममा शिक्षक कर्मचारीहरू समेत सक्रिय र उत्साहजनक रूपमा सहभागी भएका छन् ।

पालिकाले आगामी दिनमा शिक्षकलाई ‍(आइटी) मा जोड्दै क्रमिक रूपमा ‘एक शिक्षक एक ल्यापटप’ कार्यक्रम समेत सञ्चालन गर्ने योजना बनाएको शिक्षा शाखाले जनाएको हो । 

त्यस्तै, पालिकाले प्रधानाध्यापकहरूसँग शैक्षिक सत्र २०८२ को शैक्षिक कार्य पात्रो निर्माण गर्दै आगामी शैक्षिक सत्रबाट प्रत्येक महिनाको २ पटक अनिवार्य पावरप्वाइन्ट स्लाइडबाट शिक्षण गर्नु पर्ने योजना निर्माण गरिएको छ । यसको साथै गाउँपालिकाले विद्यालयबाट शाखा र अन्य ठाउँमा पठाउनु पर्ने कागजातहरू अनिवार्य रूपमा कम्प्युटराइज्ड गरी पठाउनुपर्ने व्यवस्था समेत गर्न लागिएको छ ।