२१ चैत, रामेछाप । जिल्ला अदालत रामेछापले अदालत प्रति नागरिकको भरोसा बढाउन पत्रकारको साथ खोजेको छ । उसले पैसा बिना अदालतले काम गर्दैन र सबै कामको लागि आर्थिक चलखेल हुन्छ भन्ने भ्रम चिर्नु आवश्यक रहेको धारणा राखेको हो । अदालतले आर्थिक अवस्था कमजोर हुनेहरूको लागि सबै जिल्लामा वैतनिक वकिलले निःशुल्क काम गर्ने प्रष्याउँदै पीडितलाई न्याय दिलाउनको लागि अदालत सहयोगी रहने बताएको छ । 

बुधवार जिल्ला अदालतमा पत्रकारसँग अन्तरक्रिया गर्दै न्याधिश राजेन्द्र नेपालले पत्रकार एवं मिडियाहरूले अदालतको कार्य सहज र सौलिय रहेको बताएका हुन् । जिल्ला अदालतले चालु आर्थिक वर्ष २०८१/०८२ को चैत मसान्त सम्म मुद्दा फर्चौट् गर्न लिएको लक्ष्य अनुसार सत प्रतिशत कार्य सम्पन्न गरेको जानकारी गराउँदै रामेछापमा २ वर्ष भन्दा लामो अवधिका मुद्दाहरू असारपछि नरहने प्रतिबद्धता जनाए । ‘हामी लक्ष्यको शतप्रतिशत अवस्थामा छौँ, र असार पछि २ वर्ष भन्दा बढी समयका मुद्दा नरहने गरी सकाउने अवस्थामा छौँ ।’

न्याधिश नेपालले अदालत प्रति नागरिकहरूको भरोसा बढाउन आवश्यक रहेकोमा जोड् दिँदै त्यसको लागि मिडियाको महत्त्वपूर्ण भूमिका हुने बताए । ‘नागरिकहरूको भरोसा र पैसा बिना अदालतमा काम हुँदैन भन्ने भाष्यलाई हामी सबै भएर चिर्न सक्नु पर्छ ।’

आफूसँग विभिन्न जिल्लामा रहेर न्याय क्षेत्रमा काम गरेको अनुभव सुनाउँदै न्याधिश नेपालले रामेछापमा पनि कुनै मुद्दाको विषयमा मिल्न, मिलाउन कुनै खालको दबाब आफूसम्म नआएको उनको भनाइ छ । 

त्यस्तै, जिल्ला अदालतका श्रेस्तेदार मदुसुदन आचार्यले अदालतले हाल सम्म सम्पादन गरेका कार्यसम्पादन बारे जानकारी गराउँदै अदालत प्रति नागरिकको भरोसा बढाउन जरुरी देखिएको धारणा राखे । स्थानीय तहमा गठित न्यायिक समितिको कार्य सम्पादनसहित सम्बन्ध विच्छेद, उमेर नपुगी हुने यौन सम्बन्धका घटना, जबरजस्ती करणी लगायतका मुद्दामा अदालतले पारदर्शी र कानुन अनुसार नै फैसला गर्ने प्रस्ट पारे ।