२२ चैत, रामेछाप । आउँदो चैत २५ गते हुन लागेको मन्थली माध्यमिक विद्यालयको विद्यालय व्यवस्थापन समिति (विव्यस) को निर्वाचनमा नेपाली काँग्रेस र नेकपा (माओवादी केन्द्र) निकट अभिभावक सहकार्य एवं मिलेर गरेर जाने सहमति गरेका छन् ।  २० जनाको उम्मेदवारी परेकोमा शुक्रवार फिर्ता लिने अवधि भित्र ८ जनाले फिर्ता लिएपछि १२ जनाको उम्मेदवारी समेत कायम भएको निर्वाचन समितिले जनाएको हो ।  

जिल्लाको सदरमुकाम मन्थली स्थित जिल्लाकै ‘नमुना’ विद्यालयको रूपमा परिचित सरकारी क्षेत्रको सबै भन्दा धेरै विद्यार्थी अध्ययनरत मन्थली माविमा विगतका वर्षहरूमा नेकपा (माओवादी केन्द्र) को भागबाट श्याम सुवेदी अध्यक्ष बनिरहेका बेला उनै सुवेदीले तेस्रो कार्यकाल माविको अध्यक्ष बन्न जोड् बल गरेपछि माओवादी निकट अभिभावकले काँग्रेस निकट अभिभावकसँग सहकार्य गर्दै निर्वाचनमा जाने निर्णय गरेको जानकारी प्राप्त भएको हो ।

शुक्रवार दुई दलका शीर्ष नेताहरू बिच भएको छलफलमा एक पुरुष र एक महिला काँग्रेसले लिने र नेकपा (माओवादी केन्द्र) ले पनि एक महिला र एक पुरुष सदस्य लिने सहमति बनेको हो ।जसमा नेतृत्व कै अर्थ राख्ने मनोनीत सदस्य पद भने नेपाली काँग्रेसका अभिभावकलाई दिइएको उच्च स्रोतले रामेछाप टाइम्सलाई बतायो ।

जिल्ला स्तर कै पहिचान बनाउन सफल मन्थली माविमा १३ सय ३४ जना अभिभावकले (विव्यस) समितिको अध्यक्ष चुन्न मतदान गर्ने छन् । त्यसको लागि नेकपा (एमाले) रामेछापले पनि हालकै नेकपा (माओवादी केन्द्र) को भागबाटै (विव्यस) समितिको अध्यक्ष बनेका सुवेदीलाई पार्टीको तर्फबाट नेतृत्वको रूपमा अगाडि सरेर निर्वाचनमा जाने तयारी भइरहेको उच्च स्रोतको दाबी छ । 

गएको १९ गते भएको उम्मेदवारी दर्तामा २० जनाको उम्मेदवारी दर्ता भएकोमा हाल निर्वाचनमा जानको लागि १२ जनाको उम्मेदवारी कायम निर्वाचन समितिले जनाएको हो । जसमा नेपाली काँग्रेस र नेकपा (माओवादी) निकट अभिभावकहरूको तर्फबाट खुल्लामा गणेश माझी र डल्ले माझी (राजकुमार) र महिला तर्फ उर्मिला भुजेल र कविता काफ्लेको उम्मेदवारी कायम भएको हो ।

त्यस्तै, नेकपा (एमाले) निकट अभिभावको तर्फबाट खुल्लामा सुनिल कार्की र यमबहादुर बुढाथोकी र महिला तर्फबाट विनीता माझी र रमा बसेलको उमेद्वार कायम भएको निर्वाचन समितिले जनाएको हो । 

त्यस्तै, स्वतन्त्र उम्मेद्वार भन्दै उम्मेदवारी दिइएकी (रास्वपा) रामेछापकी नेतृ एवं संघीय निर्वाचनमा प्रत्यक्षबाट उम्मेद्वार समेत बनेकी नेतृ समीक्षा श्रेष्ठ सहित अन्य तीन जना स्वतन्त्र उम्मेद्वारको पनि उम्मेदवारी कायम भएको समितिले जनाएको छ । नेतृ श्रेष्ठले आफ्नो पार्टीको तर्फबाट नभई स्वतन्त्र उम्मेद्वरी रहेको दाबी गरेकी छिन् । किनकि, (रास्वपा‌) ले केन्द्र देखि विद्यालयमा राजनीति नगर्ने दाबी गर्दै आएको छ । तर, मन्थली माविको निर्वाचन हुने चर्चाका बिच रास्वपाका जिल्ला उपसभापति मोहन कार्की सो माविको कार्यक्रममा भाग लिएका थिए । 

रास्वपा उपसभापति मोहन कार्की मन्थली माविको अभिभावक भेलामा सहभागी । तस्बिर स्रोत मोहन कार्कीको फेस्बुक

खुलेर राजनीतिमा चर्चामा नआएका शिवकुमारी श्रेष्ठ, नवराज अधिकारी र मञ्जु लुइँटेलले आफूहरूको स्वतन्त्र उम्मेदवारी रहेको बताएका छन् । उनीहरूको कायम भएको हो । 

भर्खरै सम्पन्न भएको जिल्लाको एक मात्रै स्ववियु निर्वाचन हुने मन्थली सहिद स्मृति बहुमुखी क्याम्पसको नेतृत्वमा सिङ्गल–सिङ्गल चुनाव लडेर सेटै गुमाउन पुगेको परिस्थितिबाट पाठ सिक्दै काँग्रेस र माओवादी केन्द्रले मिलेर नेतृत्वसहितका पद लिने तयारीमा जुटेका हुन् ।