रामेछापमा आजदेखि ४ दर्जन बढी ‘बाम्पन्थी नेताहरूको’ जमघटः कठजोर र भँगेरीमा हलो जोत्नेदेखि किसानको खेत खन्ने कार्यक्रम तय
२३ चैत, रामेछाप । रामेछापमा शनिवार नेपाल कम्युनिष्ट पार्टी एवं बाम्पन्थी वैचारिक नेताहरूको बाक्लो उपस्थिति हुने भएको छ । त्यसको लागि तयारी पूरा भएको आयोजक पुष्पलाल जन्म शताब्दी, कृष्णलाल बलिदान शताब्दी मूल समारोह समितिले जनाएको छ ।
काठमाडौँबाट बाम्पन्थी नेताहरू शनिवारै रामेछापको मन्थली आउने र कृष्णलालको जन्म थलो कठजोर र पुष्पलालको जन्म स्थल रामेछापको भँगेरी जाने कार्यक्रम रहेको आयोजक मूल समारोह समितिका संयोजक अशोक सुवेदीले पत्रकार सम्मेलन गरी जानकारी दिए । उनले भने ‘हामीले बाम्पन्थी वैचारिक नेताहरूले आज सम्म करिब ५० जनाले स–उपस्थिति हुने जानकारी गराउनु भएको छ’ ।
नेकपा (एमाले) का उपाध्यक्ष युवराज ज्ञवाली, नेकपा (माओवादी) केन्द्रका स्थायी समिति सदस्य लीलामणि पोखरेल, नेकपा (एस) की नेतृ रामकुमारी झाँक्री, नेपाल कम्युनिष्ट पार्टी (माले) का सिपि मैनाली, समाजवादी कम्युनिष्ट पार्टी नेपालबाट पूर्णबहादुर सिंह (समर्थन), नेपालको नेन्सन मण्डेला भनेर चिनिने मोहन चन्द्र अधिकारी, परराष्ट्रविद हिरण्य लाल श्रेष्ठ, प्रा.डा. सुरेन्द्र केसी, प्रा.डा. हेमनाथ पौडेल, नेकपाका अध्यक्ष लोकनारायण सुवेदी, नेकपाको स्थायी समिति सदस्य रामनारायण भण्डारी (जसले भारतबाट पुष्पलाल श्रेष्ठको अस्तु ल्याए), जनयुद्धका पहल थाल्ने मध्येका एकनाराण शर्मा, महिला नेतृ हिसिला यामी, शान्त मानवी, कम्युनिष्ट नेता मोहन चन्द्र अधिकारीसहित ५० जना भन्दा बढी वैचारिक बाम्पन्थी नेताहरू रामेछाप आएर पुष्पलाल र कृष्णलालको भूमिमा उनीहरू योगदानको चर्चा गर्ने आयोजक समितिका सुवेदीको भनाई छ ।
त्यस्तै, जनयुद्धको सहिद परिवारबाट सरला रेग्मी, जनयुद्धको सहिद परिवारबाटै लक्षमी पौडेलपनि यहाँ आउने नेता सुवेदीको भनाई छ । शनिवार हामी कठजोर र भँगेरी जान्छौँ । त्यहाँ उनीहरूको सालिक अनावरण लगायतको कार्यक्रम छ’ आइतबार २४ गते बिहान सबै नेताहरू मन्थलीका स्थानीय कृषकहरूको बारीमा पुगेर खन्ने, जोत्ने, कमै गोड्ने देखि कृषि कर्म गराउने सुनाउँदै नेता सुवेदीले भने ‘उहाँहरू सबै कृषि कर्मको अवस्थामा जोडिने नै भन्नु भएको छ ।’
८ जना कम्युनिष्ट नेताहरूलाई अभिनन्दन गर्ने बताउँदै आइतबार १० बजेदेखि मन्थली नगरपालिकाको हलमा रामेछापमा ‘पुष्पलाल मार्कवादी’ विश्व विद्यालय खोल्ने देखि रामेछापलाई कम्युनिष्टको किल्ला बनाउने सम्मको कार्यपत्र प्रस्तुत गरिने जानकारी दिए ।
जिल्ला तहका सबै राजनीतिक दलका नेताहरूलाई समेत कार्यक्रममा डाकिएको जानकारी दिँदै एमालेबाट कैलाश ढुङ्गेल, माधव ढुङ्गेल, श्यामकुमार श्रेष्ठ (कुशल) लगायतका नेताहरूको पनि सहभागी हुने बताए ।
३६ औँ जनआन्दोलन दिवस समेत पारेर आइतबार हुन लागेको बाम्पन्थी वैचारिक कार्यक्रममा आजदेखि पर्सि २५ गतेसम्म ‘पुष्पलाल मार्क्सवादी विश्वविद्यालय’ स्थापनालाई जोडेर विभिन्न तहमा छलफल र कार्यपत्र प्रस्तुत सँगै अभिनन्दन कार्यक्रम राखिएको बताए ।
