१४ मंसिर, रामेछाप । नेकपा (एमाले) रामेछापले सहमतिमै ११ औँ राष्ट्रिय महाधिवेशन प्रतिनिधि छनोट गरेको छ । आज बिहान बसेको जिल्ला इन्चार्ज कमल प्रसाद चौलागाई नेतृत्वको ४ सदस्यीय सहमति कमिटीले बाह्रै जनाको नाम सहमतिमै टुङ्ग्एको एमाले खाँडादेवी गाउँपालिकाका अध्यक्ष मोतीलाल तामाङले रामेछाप टाइम्सलाई बताए । १२ जना प्रतिनिधि छनोटको लागि रामेछापमा कूल ६७ जनाले उम्मेद्वारी दर्ता गरेका थिए । नेता केही नेताहरुले भने सामाजिक संजालमा असन्तुष्टि व्यक्त गरिरहेका छन् । 

उनका अनुसार खुल्ला पुरुष तर्फ टंक चौलागाई (दोरम्बा गाउँपालिका–६) सहित ५ जना चयन भएका छन् । जसमा नेता ज्ञान कुमार योञ्जन (सुनापति गाउँपालिका–२), इन्द्रबहादुर तामाङ (खाँडादेवी गाउँपालिका–६), शान्ति प्रसाद पौडेल (गोकुलगंगा गाउँपालिका–५), पुरुषोत्तम कडरिया (लिखु तामाकोशी गाउँपालिका–६), आनन्द कुमार श्रेष्ठ (मन्थली नगरपालिका–६) सर्व सहमतिमा नाम टुङ्गो लागेको हो । खुल्लामा ३४ जना पुरुषले उम्मेदवारी दर्ता गरेका थिए । यद्यपी यी नेताहरुको नाम निर्वाचन समितिले घोषणा गर्न बाँकी छ।  

त्यस्तै, महिला तर्फ उमाकुण्ड गाउँपालिकाकी गंगा कार्की, मन्थली नगरपालिकाकी शान्ता न्यौपाने सुवेदी, खाँडादेवी गाउँपालिकबाट मखमली श्रेष्ठ र रामेछाप नगरपालिकाबाट सिता केसी चयन भएका छन् । उसको १५ जनाले उम्मेदवारी दर्ता गरेका थिए । 

त्यस्तै युवा तर्फबाट बलबहादुर माझीको नाम टुङ्गो लागेको छ । १ जना मनोनयनको लागि १५ जनाले उम्मेदवारी दिएका थिए ।  उत्पीडित दलित तर्फ सिताराम लोहार चयन भएका हुन् । उत्पीडित तर्फ १ जनाको लागि भएको मनोनयनमा तीन जनाले उम्मेदवारी दिएका थिए ।