१२ फागुन, रामेछाप । जिल्ला अस्पताल रामेछापमा पहिलो पटक डायलायसिस सेवा सुरु भएको छ । जिल्लामा यसअगाडि निजी क्षेत्रबाट सञ्चालित तामाकोसी अस्पताल र मन्थली नगरपालिकाबाट सञ्चालित मन्थली अस्पतालले डायलायसिस सेवा सुरु गरी सकेका छन् । 

बिहीबार देखि पुरानो सदरमुकाम रामेछाप स्थित जिल्ला अस्पतालमा डाइलासिस् सेवा सुचारु भएको जिल्ला अस्पताल रामेछापले जानकारी दिएको छ । अस्पतालले भनेको छ ‘यस रामेछाप जिल्ला अस्पतालमा आजबाट हामीले डायलायसिस सेवा सुरु गरेका छौ।’

मिर्गौला रोगबाट पीडितहरूले विगतमा डाइलासिस गर्नकै लागि काठमाडौँ र धुलिखेल धाउनु पर्न बाध्यता थियो । अब त्यो बाध्यता हटेको छ । बागमती प्रदेश सरकारको पहलमा जिल्ला अस्पतालमा सेवा सुचारु भएको अस्पतालका मेडिकल सुपरिटेन्डेन्ट डा.गगन अधिकारीले रामेछाप टाइम्सलाई बताए । 

डायलासिस सफल भएपछि सामूहीक तस्बिर खिचाउँदै डाक्टरहरु,  तस्बिर स्रोत जिल्ला अस्पताल ।

उनका अनुसार उनी सहित डा.भूषण सुवेदी, डा.पवन खत्री र नर्सिङ इन्चार्ज यशोदा बरालसहितको टोलीले सेवा दिने गरी सेवा सुरु गरेको हो ।  यो सेवा सुचारु गर्नको लागि आवश्यक पाँच वटा मेसिनको व्यवस्थापन भएपछि अस्पतालमा डायलायसिसका गर्न सकिने भएको हो । 

विगतमा डाइलसिस नहुनदाँ नागरिकहरूले निकै सास्ती खेप्नु परेको थियो । ‘यहाँका सेवाग्राहीको मागलाई ध्यानमा राखेर सेवा विस्तार गरेका हौँ । पहल पहिले देखिनै भएको हो । अहिले सफल भयौँ । 

अबदेखि दैनिक दुई जना बिरामीको यहाँ सजिलै डायलायसिस गरिने छ । पहिलो पटक रामेछाप नगरपालिकाकै एक महिलाको डायलायसिस गरेर सेवा सुरु गरिएको उनले बताए । 

सेवा विस्तार भएपछि आफूहरू पनि सेवा गर्न पाएकोमा सुखी भएको डा‍.अधिकारीले बताए । 

पहिलो पटक डा.भूषण सुबेदी, डा.पवन खत्री, नर्सिङ इन्चार्ज यशोदा बराल, स्टाफ नर्स शान्ति अधिकारी, स्टाफहरू नर्स मनिता योन्जन,स्मृति मगर, शिखा हायु र पदम शङ्कर गौतम  राजन फुयाँल, प्रेम बस्नेत, सहित अस्पतालका अन्य कर्मचारीहरूले पहिलो प्रयासमा डाइलासिस् सफल भएको जिल्ला अस्पतालले जनाएको हो । 

भिडिओ स्रोत जिल्ला अस्पताल