नेविसंघ रामेछापले आयोजना गरेको प्रथम नेविसंघ कपको खेल तालिका परिमार्जन
फाइल फोटो ।
२० असोज, रामेछाप । नेपाल विद्यार्थी संघ रामेछापले आयोजना गरेको ‘प्रथम नेविसंघ कप २०८०’ को खेल तालिका एक दिन थप गरी परिमार्जन सहित सार्वजनिक गरिएको छ । यस अगाडि दुई दिन अगाडि अर्थात् यही असोज २६ गतेदेखि खेल सुरु भएर २८ गते सकिने गरी तालिका सार्वजनिक गरेको नेविसंघ रामेछापले शनिवार बिहान परिमार्जन सहितको मिति राखेर सार्वजनिक गरेको हो ।
रामेछाप सहित बागमती प्रदेशका १३ जिल्लाको सहभागिता हुने खुल्ला पुरुष भलिबल प्रतियोगिता अब असोज २८ गते आइतबार देखि सुरु भएर असोज ३० गते मंगलबार सकिने छ ।
मन्थली स्थित जिल्ला समन्वय समिति पछाडिको खेल मैदानमा हुने भलिबल प्रतियोगिता केही प्राविधिक कारणले पछाडि सारेको नेविसंघ रामेछापका अध्यक्ष विनोद बुढाथोकीले रामेछाप टाइम्सलाई बताए । ‘केही प्राविधिक कारणले पछाडि सारेका हौँ । बाँकी पत्रकार सम्मेलन गरेर सार्वजनिक गर्छौँ ।’
परिमार्जित खेल तालिका र मिति बारे नेविसंघ रामेछापले जारी गरेको पत्र ।
अध्यक्ष बुढाथोकीले खेल समापन कार्यक्रममा आउने प्रमुख अतिथि अर्थ मन्त्री प्रकाशन महतको समयलाई ध्यानमा राखेर मिति हेरफेर गरिएको बताएका हुन् ।
विजय दशमी, शुभदीपालवी, छठको शुभ अवसरमा आयोजित खुल्ला भलिबल प्रतियोगितामा पहिलो हुने टिमले नगद २ लाख सहित शिल्ड, मेडल र प्रमाणपत्र प्राप्त गर्ने छन् ।
त्यस्तै दोस्रो हुनेले नगद १ लाख ५० हजार, तेस्रो हुनेले १ लाख र सान्त्वना हुनेले नगद ५० हजार सहित शिल्ड, मेडल र प्रमाणपत्र जित्ने आयोजकले जनाएको हो ।
