३ मंसिर, रामेछाप । उमाकुण्ड गाउँपालिका वडा नं ३ कुँबुँकाँस्थलीमा भाईले दाजुलाई खुकुरी प्रहार गरेका छन् । भाइ ३८ वर्षीय ओसिराम बस्नेतले दाजु ४९ वर्षीय देवबहादुर बस्नेतलाई घरयासी विवादमा खुकुरी प्रहार गरेको जिल्ला प्रहरी कार्यालय रामेछापले जनाएको छ । घटना शनिवारको हो । 

भाइको खुकुरी प्रहारबाट दाइ देवबहादुरको दुवै खुट्टामा र दायाँ हातमा गहिरो चोट लागि गम्भीर घाइते भएका छन् । घाइते देवबहादुरलाई स्थानीय स्वास्थ्य चौकीका डाक्टरबाट सामान्य उपचारपछि थप उपचारको लागि काठमाडौँ रेफर गरिएको छ । 

अहिले देवबहादुरको ग्रान्डी हस्पिटल काठमाडौँ उपचार भइरहेको जिप्रका रामेछापले जनाएको हो । 

आफ्नै दाजुलाई खुकुरी प्रहार गर्ने भाइ ओसिरामलाई हतियार (खुकुरी) सहित नियन्त्रणमा लिएर थप अनुसन्धान भइरहेको जिप्रका रामेछापले भनेको छ ।