१४ चैत, रामेछाप । लिखु तामाकोशी गाउँपालिकामा भोलि बिहीबार शोक बिदा दिइएको छ । पालिकाको वडा नं ५ नागदह स्वास्थ्य चौकीमा कार्यरत अ.हे.व.राम बाबु साहको गत मंगलबार सवारी दुर्घटनामा परी निधन भएकाले शोक बिदा दिएको गाउँपालिकाले जनाएको छ । 

पालिकाले बुधवार जारी गरेको शोक पत्रमा ‘कार्यकालको समयभर निजले राष्ट्रसेवकको रूपमा गाउँपालिका बासी र जनसमुदाय प्रति योगदान गरेको स्मरण गर्दै पालिकाले बिहीबार गाउँ कार्यपालिकाको कार्यालय साथै मातहतका वडा कार्यालयहरू, स्वास्थ्य संस्थामा अत्यावश्यक सेवा बाहेक सेवा बन्द हुनेछ’ उल्लेख गरिएको छ । 

बुधवार बसेको गाउँ कार्यपालिका बैठकले बिहीबार शोक बिदा दिने निर्णय गरेको प्रमुख प्रशासकीय अधिकृत विनोद कुमार अधिकारीले जानकारी दिए । 

मंगलबार बिहान सवा ६ बजेतिर महोत्तरीको लक्ष्मीनियामा लोहारपट्टीमा बी.एल.१२ सी ०९४४ भारतीय नम्बरको कारले साह सवार प्रदेश २–०२–००४ प ६९४७ मोटरसाइकललाई पछाडिबाट ठक्कर दिँदा उनको ज्यान गएको थियो ।