५ फागुन, रामेछाप । रामेछापको बेतालीमा १४ वर्षीय बालिकाले विषादी सेवन गरेकी छिन् । उनको उद्धार गरी अहिले काठमाडौँ लगिएको छ । 

श्री मावि फर्पुमा अध्ययनरत गोकुलगंगा गाउँपालिका वडा नं ४ बेतालीकी अन्दाजी १४ वर्षीय बालिकाले घरबाट विषादी सेवन गरी विद्यालय गएको र त्यहाँ एक्कासि बिरामी परेपछि उनको उद्धार गरी मन्थली अस्पताल ल्याइएको जिल्ला प्रहरी कार्यालय रामेछापले जनाएको हो । ‘घरमै विषादी सेवन गरेको र विद्यालय पुगेपछि असर गरेको पाइएपछि उद्धार भएको हो’ जिल्ला प्रहरी कार्यालय रामेछापका एक प्रहरी अधिकारीले रामेछाप टाइम्सलाई भने ‘अहिले सामान्य हुनु हुन्छ । परिवारका सदस्यले थप उपचार गर्न काठमाडौँ लगेका हुन् ।’

विषादी सेवन किन गरिन् भन्ने बारेमा कारण नखुलेको बताइएको छ । उद्धार गरी मन्थली अस्पताल ल्याइएकी उनको उपचार पछि अवस्था सामान्य रहेको छ । उनको नाम नाबालिग भएकाले गोप्य राखिएको छ ।