९ फागुन, रामेछाप । बिहीबार नलिञ्चोकमा बनेपा धुलिखेल सडक खण्ड (रुट) मा चल्ने बसले ठक्कर दिँदा रामेछाप बेथानका एक युवाको ज्यान गएको छ । भने, मन्थलीका एक युवा घाइते भएका छन्।  

बसको ठक्करबाट सुनापति गाउँपालिका वडा नं ४ बेथान भल्वाडी साबिक–५ चेग्रेनका २२ वर्षीय तेम्बा दोर्जे तामाङको मृत्यु भएको तामाङको पारिवारिक स्रोतले जनाएको छ ।

जगातीबाट साँगातर्फ जाँदै गरेको बा ३ ख ७४४० नम्बरको बसमा विपविपरीत दिशाबाट आउँदै गरेको बा ४४ प ७३४२ नम्बरको मोटरसाइकल ठोक्किएको थियो । त्यसपछि जगातीबाट साँगातर्फ जाँदै गरेको बागमती प्रदेश ०२–०५५ प २५९९ नम्बरको मोटरसाइकललाई समेत ठक्कर दिँदा तीन जना घाइते भएका थिए ।

ठक्कर दिने बस र मृतक तामाङको परिवारबिच (आज) शुक्रवार बिहान १० बजे जगाती प्रहरीमा छलफल हुन लागेको बुझिएको छ । मृतक तामाङको शव अहिले डा. इवामुरामा राखिएको मृतक तामाङको पारिवारिक स्रोतले जनाएको हो । 

प्रहरीका अनुसार बा ४४ प ७३४२ नम्बरको मोटरसाइकलमा सवार रामेछापको सुनापाती गाउँपालिका ४ घर भई हाल भक्तपुरको पाण्डुबजार बस्ने तामाङको मृत्यु भएको हो ।

इवामुरा अस्पतालमा उपचारको क्रममा गएराति करिब पौने नौ बजे उनलाई चिकित्सकले मृत घोषणा गरेको जिल्ला प्रहरी परिसर भक्तपुरले जनाएको छ । उनको निधारमा गम्भीर चोट लागेको थियो ।

दुर्घटनामा भक्तपुरको सूर्यविनायक नगरपालिका ९ काँक्राबारी बस्न २४ वर्षीय साजन तामाङ र बागमती प्रदेश ०२–०५५ प २५९९ नम्बरको मोटरसाइकल चालक रामेछापको मन्थली नगरपालिका ११ घर भई हाल काभ्रेको पनौती बस्ने ३९ वर्षीय टिकाराम श्रेष्ठ घाइते छन् ।

श्रेष्ठ राति नै अस्पतालबाट डिस्चार्ज भएका छन् भने तामाङको इवामुरा अस्पतालले थप उपचारका लागि मध्यपुर अस्पताल ठिमीमा रिफर गरेको छ । उनको मुखमा भित्री चोट लागेको उपचारमा संलग्न डाक्टरलाई उद्धृत गर्दै भक्तपुर प्रहरीले जनाएको छ ।

बस चालक काभ्रेको पनौती नगरपालिका ७ घर भएका ५२ वर्षीय पुरुषोत्तम फाची श्रेष्ठलाई प्रहरी वृत्त जगातीले नियन्त्रणमा लिएको छ ।