२१ चैत, रामेछाप । रामेछापको रामेछाप नगरपालिका–५ रामपुर खानी डाँडामा विद्युत् सर्ट भएर आगोलागि हुँदा एउटा गोठ जलेको छ । आगोलागिबाट करिब ३५ हजार बराबरको क्षति भएको प्रारम्भिक अनुमान गरिएको छ । 

बुधवार दिउँसो करिब ३ बजेको समयमा सोही ठाउँका टीका राज श्रेष्ठको गोठमा बिद्युतको लाइन सर्ट भई आगलागी भएको जिल्ला प्रहरी कार्यालय रामेछापले जनाएको हो । 

उक्त, आगोलागि हुन साथ प्रहरी चौकी रामेछाप डाँडाबाट प्रहरी हवलदार टिका मगरको कमाण्डमा खटिएको टोलीले स्थानीयहरू सहितको सहयोगमा पूर्ण रूपमा नियन्त्रणमा लिएको छ । 

आगो लाग्दा श्रेष्ठको ढुङ्गा माटोले बनेको जस्ताको छानो भएको गोठको एक भाग जलेको छ भने अन्नपात पनि जल्दा अन्दाजी ३५ हजार बराबरको क्षति भएको बताइएको छ । 

उक्त घटनामा मानवीय र पशुचौपायको क्षति भने हुन नपाएको प्रहरीको भनाई छ । 

यो वर्षको हिउँद (हाल सम्म) जिल्लामा गत वर्षको तुलनामा आगोलागि एवं डढेलोका घटना कम भएका छन् । साथै, वन क्षेत्रमा डढेलो एवं आगो लगाउने व्यक्तिहरूलाई समेत प्रहरी र डिभिजन वन कार्यालय रामेछापको सक्रियतामा नियन्त्रणमा धमाधम लिइरहेको अवस्था छ । 

अहिले पनि जिल्ला प्रहरी कार्यालय रामेछापमा जिल्लाका विभिन्न ठाउँमा डढेलो एवं आगो लगाउनेहरू अनुसन्धानको घेरोमा रहेको जिल्ला प्रहरी कार्यालय रामेछापका प्रमुख (डिएसपी) प्रदीप कुमार सिंहले बताए । 

त्यस्तै, डिभिजन वन कार्यालय रामेछापले पनि धमाधम टोली परिचालन गरेर आगो लगाउने र लाग्ने स्थानहरूको पहिचान गरी संलग्नहरूलाई कारबाही गर्न खटिएको डिभिजन वन कार्यालय रामेछापको भनाई छ ।