२० चैत, रामेछाप । मन्थली नगरपालिका वडा नं ९ पुरानागाउँमा वडाले खेलकुदको लागि विनियोजन गरेको बजेट कुनै प्रतियोगिता नै नगरी भुक्तानी गरिएको भन्दै वडा खेलकुद समितिकै अध्यक्षले प्रशासनमा उजुरी दिएका छन् । उक्त विषयमा छानबिन गरी सत्य, तथ्य सार्वजनिक हुनु पर्ने मागसहित खेलकुद विकास समितिका अध्यक्ष प्रकाश सोडारीले निवेदन दर्ता गरेको उच्च स्रोतले रामेछाप टाइम्सलाई जानकारी दिएको छ । 

यही चैत १७ गते ‘कारबाही गरिपाऊँ’ भन्दै वडा खेलकुद विकास समितिका अध्यक्ष सोडारीले जिल्ला प्रशासन कार्यालय रामेछापका निवेदन दर्ता गरेका हुन् । 

प्रशासनमा दर्ता गरिएको पत्रमा भनिएको छ, ‘ वडा नं ९ मा चालु आर्थिक वर्ष २०८१÷०८२ मा विनियोजित वडा खेलकुद शीर्षकको बजेट वडा खेलकुद विकास समितिका अध्यक्षलाई जानकारी नै नगराई वडा अध्यक्ष गोकर्ण राज आरण र वडा सचिव रमेश राज सुवेदीले मनोमानी ढङ्गले वडामा कुनै पनि खेलकुदका कार्यक्रम नगरी खेलकुद प्रेमी युवाहरूको भावना विपरीत फर्जी बिल भर्पाई बनाई नगरपालिकाबाट भुक्तानी लिएकोले निजहरूलाई उक्त विषयमा छानबिन गरी हदै सम्मको कारबाही गरिपाऊँ’ उल्लेख गरिएको छ । 

प्रत्येक वर्ष नगरपालिकाले १४ वटै वडामा खेलकुदको लागि बजेट विनियोजन गर्दै आएको छ । तर, वडाले भने खेलकुदका कार्यक्रमै नगरी बिल भुक्तानी गरेको दाबी खेलकुद समितिका अध्यक्षले अघिल्लो वर्षा समेत गरेका थिए । 

नियमअनुसार वडामा त्यहाँका युवाहरूलाई खेलकुद क्षेत्रमा अग्रसर गराउनको लागि विभिन्न खेलकुदका कार्यक्रम गर्नु पर्ने हुन्छ तर त्यसको विपरीत वडाले मन्थली नगरपालिकाको नगर खेलकुद विकास समितिले नगरमै सञ्चालन गरेको ‘नगर कप’ लगायतका खेलकुदका गतिविधिलाई नै आधार मानेर बिल बनाई भुक्तानी लिएको पाइएको समितिका अध्यक्षको आरोप छ । 

सोही विषयमा बुझ्नलाई वडा सचिव रमेश राज सुवेदीलाई फोन गर्दा अफिसियल भनिएको नम्बरमा सम्पर्क भएन भने व्यक्तिगत नम्बरमा फोन उठेन ।