२८ मंसिर, रामेछाप । नेकपा एमाले रामेछापका जिल्ला अध्यक्ष आनन्द श्रेष्ठ पदाधिकारीसहित पार्टी अध्यक्ष केपी शर्मा ओली निवास पुगेका छन् । 

मङ्गलवार उनीहरू अध्यक्ष ओलीलाई भेट्न ओली निवास बालकोट पुगेको पार्टी उपसचिव एवं प्रचार तथा प्रकाशन विभाग प्रमुख प्रकाश कुमार कार्कीले जानकारी दिए । 

उनका अनुसार भेटमा प्रतिनिधि सभा एवं प्रदेश सभा निर्वाचनमा नेकपा एमालेलाई लोकप्रिय मत प्राप्त गर्न कुशलता पूर्वक नेतृत्व गरेको र झापा ५ बाट विजयी भएकोमा ओलीलाई बधाई तथा शुभकामना दिएको कार्कीले बताए । 

जिल्ला कमिटी अध्यक्ष समेत रहेका श्रेष्ठ समानुपातिकबाट बागमती प्रदेश सभा सदस्यमा मनोनीत भएपछि पहिलो पटक भेट्न पुगेका हुन् । 

पूर्व प्रधानमन्त्री समेत रहेका ओलीलाई भेट्नलाई अध्यक्ष श्रेष्ठ सहित सचिव पुरुषोत्तम कडरिया, उपसचिव कार्की, दिनेश सुवेदी लगाएका नेताहरू पुगेका हुन् । 

एमाले रामेछापले गत निर्वाचनमा समानुपातिक बाहेक सबै सिटमा पराजित भोगेको थियो । समानुपातिकमा एमाले रामेछापबाट अध्यक्ष समेत रहेका श्रेष्ठ र प्रदेश कमिटी सदस्य मायाँ कार्की मनोनीत भएका थिए ।