२१ कात्तिक, रामेछाप । उमाकुण्ड गाउँपालिका वडा नं १ गुम्देलमा साबिकको वडा (१ देखि ९ सम्म) टोल स्तरीय भलिबल प्रतियोगिता हुने भएको छ । साबिक वडा नं १ देखि ९ वडाबिच प्रतिस्पर्धा हुने भएको हो । 

यही कात्तिक २५ गते काग तिहारदेखि २६ गते कुकुर तिहारको दिन सम्म दुई दिन शुभ दीपावलीको अवसर पारेर खेल आयोजना गरिएको गुम्देल खेलकुद विकास समितिले जनाएको छ ।

नकआउट आधारमा खेलाइने खेलमा सोही वडाका खेलाडीले मात्रै खेल खेल्न पाउने छन् । कुनै टोलमा खेलाडी नपुगेको खण्डमा आयोजकसँग समन्वय गरेर अर्को टोलको खेलाडी समावेश गर्न पाउने भनिएको छ । 

उमातिर्थ क्लबको खेल मैदान गुम्देल बसपार्कमा हुने सो प्रतियोगितामा प्रथम हुनेले नगद १५ हजारको साथमा प्रमाणपत्र प्राप्त गर्ने छ । 

त्यस्तै द्वितीय र तृतीय हुनेले क्रमशः ७ हजार र ५ हजार सहित प्रमाण पत्र पाउने छन् ।