१ चैत, रामेछाप । नेपाल पत्रकार महासंघ जिल्ला शाखा रामेछापको पहलमा क्रियाशील पत्रकारहरूलाई शिविर सञ्चालन गरी ‘प्रेस पास’ वितरण गरिएको छ । 

आदिवासी जनजाति पत्रकार महासंघ (फोनिज) बागमती प्रदेशको तेस्रो प्रादेशिक महाधिवेशनको विशेष अवसर पारेर पत्रकार महासंघ जिल्ला शाखा रामेछापले प्रदेश सञ्चार रजिष्ट्रारको कार्यालयले प्रदान गर्दै आएको ‘प्रेस पास’ एक दिने शिविर सञ्चालन गरी वितरण गरिएको हो । 

प्रदेश रजिस्ट्रार प्रमुख रेवती प्रसाद सापकोटासहितको उपस्थितिमा वितरण गरिएको ‘प्रेस पास’ २६ जनाले लिएको रजिस्ट्रार प्रमुख सापकोटाले बताए । 

प्रदेश सञ्चार रजिष्ट्रारको कार्यालयमा दर्ता भएका अनलाइन, रेडियो, पत्रपत्रिकासहितका मिडियाकर्मीहरूले प्रेस पास विभिन्न कारणले लिन नसकिरहेको परिस्थितिलाई मध्यनजर गरी एक दिने शिविरै ल्याएर सहज रूपमा प्रदान गरिएको महासंघ जिल्ला शाखाका अध्यक्ष दीपक कुमार घिमिरेले बताए । पत्रकारहरूलाई सरकारी निकायले प्रदान गर्ने आधिकारी ‘कार्ड’ को सदुपयोग गर्नु पर्नेमा जोड् दिँदै अध्यक्ष घिमिरेले प्रेस पास नभएर ‘पत्रकारहरू’ कुनै पनि कार्यक्रम र अवसरबाट वञ्चित हुन नपर्ने धारणा राखे ।